5 ສິ່ງທີ່ຄວນເຮັດຫຼັງຕື່ນນອນ

ທຸກໆມື້ແຕ່ລະຄົນຕ້ອງຜະເຊີນກັບຄວາມວຸ້ນວາຍຫລາຍຢ່າງ, ເຮົາຄວນຮັບມືກັບກິດຈະວັດປະຈໍາວັນດ້ວຍສຸຂະພາບທີ່ດີ ແລະ ຈິດໃຈທີ່ປອດໂປ່ງ ໂດຍສະເພາະຫລັງຕື່ນນອນ ຖ້າທ່ານມີອາການເຫລົ່ານີ້ເຊັ່ນ: ຮູ້ ສຶກບໍ່ສົດຊື່ນ, ງ່ວງ, ຂີ້ຄ້ານລຸກຈາກຕຽງ, ບໍ່ມີພະລັງຈະໄປໂຮງຮຽນ ຫລື ໄປເຮັດວຽກ ເຊິ່ງອາການເຫລົ່ານີ້ອາດຈະສະແດງໃຫ້ເຫັນວ່າປະສິດທິພາບຮ່າງກາຍຂອງທ່ານເລີ່ມຫຼຸດລົງດ້ວຍອາຍຸຫລາຍຂຶ້ນ ແລະຂາດ ການດູແລ ຖ້າເຮົາປ່ອຍປະລະເລີຍ ອາດຈະເຮັດໃຫ້ເກີດພະຍາດອື່ນໆຕາມມາອີກ. ດັ່ງນັ້ນ, ເຮົາຄວນປັບປ່ຽນກິດຈະກໍາແຕ່ລະເຊົ້າ ເພື່ອເສີມສ້າງປະສິດທິພາບຂອງຮ່າງກາຍ ເຮັດໃຫ້ສົດຊື່ນ ພ້ອມຈະຜະເຊີນກັບສິ່ງຕ່າງໆ

1. ເຄື່ອນໄຫວຮ່າງກາຍ ຫລື ອອກກໍາລັງກາຍ

ການອອກກໍາລັງກາຍໃນຕອນເຊົ້າ ຈະຊ່ວຍເພີ່ມຄວາມສົດຊື່ນ ກະຕຸ້ນລະບົບປະສາດ ແລະກ້າມຊີ້ນໃນຮ່າງກາຍ ພຽງແຕ່ ແລ່ນຊ້າໆ, ຍ່າງໄວ, ບິດຄີງ ຫຼື ໂດດ ແລະ ຕົບມື ກໍໄດ້.

2. ດື່ມນໍ້າເພື່ອເພີ່ມນໍ້າໃຫ້ຮ່າງກາຍ.

ຮ່າງກາຍຂອງຄົນເຮົາປະກອບໄປດ້ວຍນໍ້າ 75% ຈຶ່ງຈໍາເປັນຕ້ອງດື່ມນໍ້າທຳມະດາ 1-2 ຈອກ ເພື່ອຫລຸດການຂາດນໍ້າຂອງຮ່າງກາຍ ແລະ ຊ່ວຍຟື້ນຟູຮ່າງກາຍຂອງເຮົາຈາກການນອນຫລາຍຊົ່ວໂມງຕິດຕໍ່ກັນ ເພາະຮ່າງກາຍຂອງເຮົາຂາດນໍ້າຕະຫຼອດເວລາ ການດື່ມນໍ້າຫຼັງຕື່ນນອນຈະຊ່ວຍໃຫ້ສະໝອງປອດ ໂປ່ງ ແລະ ສົດຊື່ນຂຶ້ນ.

3. ກິນອາຫານເຊົ້າເພື່ອເພີ່ມພະລັງງານ.

ອາຫານເຊົ້າຖືເປັນສິ່ງສໍາຄັນ ເຖິງຈະບໍ່ຫິວແຕ່ກໍຈໍາເປັນຕ້ອງກິນເພື່ອເພີ່ມພະລັງງານໃຫ້ຮ່າງກາຍ, ແຕ່ຄວນເລືອກກິນອາຫານທີ່ຍ່ອຍງ່າຍ ເນັ້ນທາດໂປຣຕີນ ແລະທາດແປ້ງເພື່ອໃຫ້ຮ່າງກາຍໄດ້ຮັບພະລັງງານຢ່າງເຕັມທີ່ເຊັ່ນ ໝາກກ້ວຍ, ເຂົ້າຈີ່… ຖ້າບໍ່ກິນຫຍັງຂະນະທີ່ທ້ອງວ່າງ ອາດຈະເຮັດໃຫ້ຕຸ້ຍ ມີໄຂມັນສະສົມຢູ່ບໍລິເວນທ້ອງ, ຄໍເລສເຕີຣໍສູງ ແລະ ສ່ຽງຕໍ່ການເປັນພະຍາດຫົວໃຈ.

4. ເປີດເພງຟັງໃນຕອນເຊົ້າ.

ການຟັງເພງໃນຕອນເຊົ້າ ຈະຊ່ວຍໃຫ້ອາລົມດີຂຶ້ນ, ຮ່າງກາຍສົດຊື່ນ ແລະຊ່ວຍໃຫ້ຕື່ນຕົວຫຼາຍຂຶ້ນ ໂດຍສະເພາະການຟັງເພງຄ່ອຍໆໃນຕອນເຊົ້າກ່ອນຈະໄປເຮັດວຽກ ຫລື ໄປໂຮງຮຽນ ເຮັດໃຫ້ຈິດໃຈປອດໂປ່ງມີພະລັງບວກ ແລະ ຜ່ອນຄາຍອີກດ້ວຍ.

5. ຂັບຖ່າຍຕອນເຊົ້າ

ຄົນເຮົາຄວນຂັບຖ່າຍຕອນເຊົ້າທຸກໆມື້ ເພື່ອຂັບຖ່າຍສິ່ງເສດເຫລືອອອກຈາກຮ່າງກາຍລວມທັງເປັນການສ້າງລະບົບຍ່ອຍອາຫານທີ່ດີສໍາລັບຮ່າງກາຍ, ເວລາທີ່ເໝາະຕໍ່ການຖ່າຍຕອນເຊົ້າເວລາ 5:00-7:00 ໂມງເຊິ່ງເປັນເວລາທີ່ ລໍາໄສ້ເຮັດວຽກຂັບຖ່າຍຂອງເສຍອອກຈາກຮ່າງກາຍ ເນື່ອງຈາກຂະນະທີ່ນອນຫລັບ ລໍາໄສ້ອ່ອນ ແລະລໍ າໄສ້ແກ່ພວມຍ່ອຍອາຫານ ແລະ ດູດຊຶມສານອາຫານ.