ຟີຟ່າ-ຢູຟ່າ ປະກາດ ຕັດ ຣັດເຊຍ ອອກຈາກການແຂ່ງຂັນທຸກລາຍການ

2 ອົງກອນ​ກິລາ​ບານ​ເຕະ​ໂລກ ​ໄດ້​ຫ້າມ​ບໍ່​ໃຫ້​ທີມຊາດ ຣັດ​ເຊຍ ​ແລະ ສະໂມສອນຈາກ​ຣັດ​ເຊຍ ​ເຂົ້າ​ຮ່ວມ​ການ​ແຂ່ງຂັນ​ທຸກລາຍການແລ້ວ.

ສະຫະພັນບານເຕະນາໆຊາດ (ຟີຟ່າ) ແລະ ສະຫະພັນບານເຕະເອີຣົບ (ຢູຟ່າ) ໄດ້ອອກຖະແຫຼງການຫ້າມທີມຊາດຣັດເຊຍ ແລະ ສະໂມສອນຂອງຣັດເຊຍ ລົງແຂ່ງຂັນທຸກລາຍການ ຈົນກວ່າຈະມີແຈ້ງການເພີ່ມເຕີມ.

ກ່ອນໜ້ານີ້ ຟີຟ່າ ຍັງບໍ່ໄດ້ຕັດສິນໃຈຫ້າມທີມຊາດຣັດເຊຍ ແຕ່ເລືອກທີ່ຈະບັງຄັບໃຊ້ມາດຕະການກົດດັນເຊັ່ນ: ຫ້າມຈັດການແຂ່ງຂັນພາຍໃນປະເທດ, ໃຫ້ພວກເຂົາລົງຫລິ້ນໃນສະຫນາມກິລາທີ່ບໍ່ມີແຟນບານ, ໃຫ້ໃສ່ຊື່ຂອງສະຫະພັນບານເຕະຣັດເຊຍແທນຣັດເຊຍ, ຫ້າມໃຊ້ທຸງຊາດ ແລະ ເພງຊາດໃນການແຂ່ງຂັນ.

ຢ່າງໃດກໍຕາມ, ຫຼັງຈາກປຶກສາຫາລືກັບ ຢູຟ່າ ທັງ​ສອງ​ອົງການ​ກິລາ​ບານ​ເຕະ​ໂລກ​ໄດ້​ຕົກລົງ​ຫ້າມ​ຣັດ​ເຊຍ ຊຶ່ງ​ໝາຍ​ຄວາມ​ວ່າ​ຣັດ​ເຊຍ​ຈະ​ບໍ່​ໄດ້ລົງ​ແຂ່ງຂັນ​ໃນ​​ເຕະບານ​ໂລກ​ປີ 2022 ທີ່​ຈະ​ແຂ່ງຂັນ​ກັບ​ໂປ​ແລນ​ໃນ​ເດືອນ​ມີນາ ແລະ ຕົກຮອບໄປໂດຍອັດຕະໂນມັດ ເຊັ່ນດຽວກັບ ສະປາຕາກ ມັອສໂຄ ທີ່ມີໂປຼແກມລົງດວນກັບ ແອເບ ໄລ້ຊິກ ໃນຮອບ 16 ທີມຂອງຢູໂຣປ້າ ລີກ ກໍ່ຈະຖືກປັບຕົກຮອບດ້ວຍ.

ຂະນະ​ດຽວ​ກັນ ຢູຟ່າ ຍັງ​ປະກາດ​ຢຸດຕິ​ສັນຍາ​ກັບ Gazprom ບໍລິສັດພະລັງງານຍັກ​ໃຫຍ່​​​ຂອງຣັດ​ເຊຍ ຈາກການເປັນຜູ້ສະຫນັບສະຫນູນໃນ ຢູຟ່າ ແຊ້ມປ້ຽນລີກ, ບານເຕະທີມຊາດ ແລະ ຢູໂຣ 2024 ຮອບສຸດທ້າຍ.