ເສຍດາຍທີ່ຫາກໍຄິດໄດ້ຕອນອາຍຸ 60 ປີແລ້ວ
February 15, 2022 - 5:00 PM
ຂ້ອຍຫາກໍຄິດໄດ້ເມື່ອອາຍຸ 60 ປີແລ້ວ ຖ້າຄິດໄດ້ໄວກໍຄົງຈະດີຫລາຍກັບຊີວິດທີ່ຜ່ານມາ, ເບິ່ງໂລກໃນແງ່ດີ ເປີດເຜີຍຕົນເອງ ທ່ານຈະພົບວ່າຄວາມສຸກຢູ່ບໍ່ໄກເຮົາເລີຍ. ຂ້ອຍໄດ້ຖາມໝູ່ຄົນໜຶ່ງ ເຊິ່ງຕອນນີ້ລາວອາຍຸ 60 ປີແລ້ວ, ຂ້ອຍຖາມລາວວ່າ : ເຈົ້າໄດ້ຮຽນຮູ້ຫຍັງ ແລະ ຢາກຈະປ່ຽນແປງຫຍັງທີ່ຜ່ານມາໃນຊີວິດແດ່ ?
- ຂ້ອຍຈະຖອຍຫ່າງຈາກຄົນທີ່ດູຖູກຂ້ອຍ ເພາະຄົນເຫລົ່ານັ້ນບໍ່ເຂົ້າໃຈຄຸນຄ່າໃນໂຕຂ້ອຍ. ດັ່ງນັ້ນ ຂ້ອຍຈະບໍ່ຢູ່ໃກ້ໃຫ້ເກີດຄວາມຄິດລົບ.
- ຂ້ອຍຈະບໍ່ຍຶດເອົາຄວາມຄິດຕົນເອງເປັນຫລັກ ຈົນທຳລາຍມິດຕະພາບດີໆ.
- ຂ້ອຍຈະເບິ່ງໃນດ້ານບວກ, ຊື່ນຊົມຍ້ອງຍໍຫລາຍກ່ວາຕຳໜິ ບໍ່ແມ່ນແຕ່ເຮັດໃຫ້ອີກຝ່າຍຮູ້ສຶກດີ ແຕ່ກໍຍັງເຮັດໃຫ້ເຮົາຮູ້ສຶກດີໄປນຳ.
- ຂ້ອຍຈະບໍ່ກັງວົນກັບຮອຍເປື້ອນນ້ອຍໆເທິງເຄື່ອງນຸ່ງ ຫລື ແມ່ນແຕ່ຂໍ້ຜິດພາດເລັກໆນ້ອຍໆຂອງຄົນອື່ນ.
- ຂ້ອຍຈະບໍ່ແກ້ໄຂຄວາມຜິດຄົນອື່ນ ເຖິງວ່າຄົນເຫລົ່ານັ້ນຈະຜິດ ເພາະການເຮັດໃຫ້ທຸກຄົນເປັນຄົນທີ່ສົມບູນແບບບໍ່ແມ່ນໜ້າທີ່ ແລະ ຄວາມຮັບຜິດຊອບຂອງຂ້ອຍ.
- ແຕ່ກ່ອນຂ້ອຍຮັກພໍ່ແມ່ພີ່ນ້ອງ ແລະ ໝູ່ເພື່ອນ, ແຕ່ຕອນນີ້ຂ້ອຍອາຍຸຫລາຍຂຶ້ນ ສຸຂະພາບກໍເລີ່ມຖົດຖອຍ ຂ້ອຍຫັນຫລັງກັບມາຮັກຕົນເອງຫລາຍຂຶ້ນ.
- ຂ້ອຍບໍ່ຕໍ່ລາຄານຳແມ່ຄ້າຂາຍຜັກ-ໝາກໄມ້ ຂ້ອຍອາດຈະຕ້ອງຈ່າຍເງິນຕື່ມອີກເລັກນ້ອຍ ເຊິ່ງບໍ່ໄດ້ກະທົບກັບຊີວິດຂ້ອຍ, ແຕ່ເງິນພຽງເລັກນ້ອຍທີ່ຂ້ອຍຕໍ່ລາຄາ ອາດໝາຍເຖິງຄ່າຮໍ່າຮຽນໃນອະນາຄົດຂອງລູກພວກເຂົາ.
- ເມື່ອຕ້ອງຈ່າຍຄ່າລົດໂດຍສານ ຂ້ອຍບໍ່ລໍຖ້າໃຫ້ຄົນຂັບຫາເງິນນ້ອຍມາທອນ ການໃຫ້ທິບເຂົາເລັກໆນ້ອຍໆອາດໄດ້ຮັບຮອຍຍິ້ມຕອບແທນມາ.
- ຂ້ອຍຈະບໍ່ເວົ້າກັບຜູ້ອາວຸໂສອີກວ່າ ເລື່ອງນີ້ທ່ານໄດ້ເລົ່າໃຫ້ຟັງຫລາຍເທື່ອແລ້ວ ເພາະເລື່ອງທີ່ທ່ານກຳລັງເລົ່າ ເຮັດໃຫ້ທ່ານຊ່ວຍຟື້ນຄວາມຊົງຈຳ ບໍ່ເຮັດໃຫ້ເປັນຄົນຂີ້ຫລົງຂຶ້ລືມງ່າຍ.
- ຂ້ອຍຄິດໄວ້ສະເໝີວ່າທຸກມື້ເປັນມື້ສຸດທ້າຍ ເພາະມື້ໜຶ່ງກໍຕ້ອງເຖິງມື້ສຸດທ້າຍຂອງຊີວິດ ແລະ ຂ້ອຍຈະເຮັດໃນສິ່ງທີ່ເຮັດໃຫ້ຂ້ອຍມີຄວາມສຸກ.
- ຕອນອາຍຸ 1 ປີ ຄວາມສຳເລັດແມ່ນການຍ່າງໄດ້ດ້ວຍຕົນເອງ ໂດຍທີ່ບໍ່ຕ້ອງມີໃຜມາຈູງ.
- ຕອນອາຍຸ 4 ປີ ຄວາມສຳເລັດແມ່ນບໍ່ຍ່ຽວໃສ່ໂສ້ງ.
- ຕອນອາຍຸ 8 ປີ ຄວາມສຳເລັດແມ່ນຮູ້ທາງກັບຈາກໂຮງຮຽນມາເຮືອນໄດ້.
- ຕອນອາຍຸ 15 ປີ ຄວາມສຳເລັດແມ່ນການມີໝູ່ຫລວງຫລາຍທີ່ຮັກເຮົາ.
- ຕອນອາຍຸ 18 ປີ ຄວາມສຳເລັດແມ່ນການສອບເສັງເຂົ້າມະຫາວິທະຍາໄລໄດ້.
- ຕອນອາຍຸ 22 ປີ ຄວາມສຳເລັດແມ່ນການຮຽນຈົບຈາກມະຫາວິທະຍາໄລ.
- ຕອນອາຍຸ 25 ປີ ຄວາມສຳເລັດແມ່ນການມີວຽກເຮັດ ສາມາດລ້ຽງດູຕົນເອງໄດ້.
- ຕອນອາຍຸ 30 ປີ ຄວາມສຳເລັດແມ່ນການສ້າງຄອບຄົວທີ່ອົບອຸ່ນ.
- ຕອນອາຍຸ 35 ປີ ຄວາມສຳເລັດແມ່ນການໄດ້ໃຫ້ການສຶກສາດີໆແກ່ລູກໆ.
- ຕອນອາຍຸ 50 ປີ ຄວາມສຳເລັດແມ່ນຍັງສາມາດເຮັດວຽກໄດ້ເປັນຢ່າງດີ.
- ຕອນອາຍຸ 60 ປີ ຄວາມສຳເລັດແມ່ນຍັງຂັບລົດ ພາຕົນເອງໄປໃນບ່ອນທີ່ຢາກໄປໄດ້.
- ຕອນອາຍຸ 65 ປີ ຄວາມສຳເລັດແມ່ນມີສຸຂະພາບທີ່ແຂງແຮງ ບໍ່ເຈັບບໍ່ປ່ວຍ.
- ຕອນອາຍຸ 70 ປີ ຄວາມສຳເລັດແມ່ນຍັງໄດ້ພົບປະໂອ້ລົມກັບໝູ່ເພື່ອນເກົ່າໆ.
- ຕອນອາຍຸ 75 ປີ ຄວາມສຳເລັດແມ່ນບໍ່ເປັນພາລະໃຫ້ໃຜ.
- ຕອນອາຍຸ 80 ປີ ຄວາມສຳເລັດແມ່ນຍັງຈື່ທາງກັບເຮືອນໄດ້.
- “ຫາກເຮົາມີຄວາມນັບຖືຕົນເອງ, ເບິ່ງໂລກໃນແງ່ດີ, ເປີດເຜີຍຕົນເອງ ແລະ ຄວບຄຸມຊີວິດຂອງເຮົາເອງໄດ້ ທ່ານຈະພົບວ່າຄວາມສຸກຢູ່ບໍ່ໄກໂຕເຮົາເລີຍ” (ຂອບໃຈ : ຕົ້ນສະບັບພາສາຈີນ ໝ່າຫຸ້ຍ ຫົວໜ້າບັນນາທິການສຳນັກພິມຊິງຫົວ, FW Line).
