WHO ເຕືອນ ການລະບາດຂອງເຊື້ອໂອມິຄຣອນ ໃນຫລາຍປະເທດຍັງບໍ່ເຖິງຈຸດສູງສຸດ
ອົງການອະນາໄມໂລກ (WHO) ເຕືອນວ່າ: ຫລາຍປະເທດຍັງບໍ່ເຖິງຈຸດສູງສຸດຂອງການລະບາດຂອງເຊື້ອໂຄວິດສາຍພັນໂອມິຄຣອນ. ດັ່ງນັ້ນ ຈຶ່ງແນະນຳວ່າການຫລຸດຜ່ອນມາດຕະການຄວບຄຸມການລະບາດຄວນເຮັດຢ່າງລະມັດລະວັງ ແລະ ຄ່ອຍເປັນຄ່ອຍໄປ.
ມາເຣຍ ຟານ ເຄິກໂຮຟ ເຈົ້າໜ້າທີ່ WHO ລະບຸວ່າ: “ເຮົາຂໍເຕືອນໃຫ້ລະວັງ ເພາະຫລາຍປະເທດຍັງບໍ່ຜ່ານຈຸດສູງສຸດຂອງການລະບາດຂອງເຊື້ອໂອມິຄຣອນ. ຂະນະທີ່ຫລາຍປະເທດມີຄວາມຄວບຄຸມໃນການສັກວັກຊີນໃນລະດັບຕໍ່າ ແລະ ມີບຸກຄົນທີ່ມີຄວາມສ່ຽງສູງຢູ່ໃນກຸ່ມປະຊາກອນຂອງພວກເຂົາ. ດັ່ງນັ້ນ ຕອນນີ້ຈຶ່ງຍັງບໍ່ແມ່ນເວລາທີ່ຈະຍົກເລີກມາດຕະການທຸກຢ່າງພ້ອມກັນ”.
ທ່ານ ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການ WHO ລະບຸວ່າ: ອົງການອະນາໄມໂລກມີຄວາມກັງວົນວ່າການລະບາດທີ່ຫລາຍຂຶ້ນຂອງເຊື້ອໂອມິຄຣອນອາດໝາຍເຖິງການເສຍຊີວິດທີ່ເພີ່ມຂຶ້ນ, ແຕ່ເນັ້ນວ່າ: WHO ບໍ່ໄດ້ຮຽກຮ້ອງໃຫ້ປະເທດຕ່າງໆ ກັບເຂົ້າສູ່ການລັອກດາວ, ແຕ່ຮຽກຮ້ອງໃຫ້ທຸກປະເທດປົກປ້ອງປະຊາກອນໂດຍໃຊ້ເຄື່ອງມືທັງໝົດ ບໍ່ແມ່ນສະເພາະວັກຊີນພຽງຢ່າງດຽວ.
ທ່ານ ກີບຣີເຢຊຸສ ຍັງແນະນຳອີກວ່າ: ບາງປະເທດບໍ່ຄວນເຂົ້າໃຈຜິດວ່າເຊື້ອໂອມິຄຣອນລະບາດງ່າຍ, ແຕ່ມີຄວາມຮຸນແຮງຕໍ່າ. ດັ່ງນັ້ນ ຈຶ່ງບໍ່ຈຳເປັນຕ້ອງຫາທາງປ້ອງກັນ.
“ມັນຍັງໄວເກີນໄປສຳລັບປະເທດຕ່າງໆ ໃນການຍອມຈຳນົນ ຫລື ປະກາດໄຊຊະນະ” ຜູ້ອຳນວຍການ WHO ກ່າວ.
ອ້າງອີງ:
