ອົງການຢາເອີຣົບໄຟຂຽວ Paxlovid ຢາເມັດຕ້ານໂຄວິດຂອງ Pfizer

ອົງການຢາແຫ່ງເອີຣົບອະນຸມັດການນຳໃຊ້ “ແພກໂລວິດ” ຢາເມັດຕ້ານໄວຣັສໂຄວິດ-19 ຂອງໄຟເຊີ ສຳລັບປິ່ນປົວຜູ້ຕິດເຊື້ອກຸ່ມສ່ຽງອາການໜັກ.

ວັນທີ 28 ມັງກອນ 2022, ອົງການຢາແຫ່ງເອີຣົບ (EMA) ອອກຖະແຫລງການໃນວັນທີ 27 ມັງກອນ ອະນຸມັດການນຳໃຊ້ຢາເມັດຕ້ານໂຄວິດ-19 “ແພກໂລວິດ” (Paxlovid) ແບບມີເງື່ອນໄຂ ສຳລັບໃຊ້ໃນການປິ່ນປົວຜູ້ຕິດເຊື້ອໄວຜູ້ໃຫຍ່ທີ່ມີຄວາມສ່ຽງເກີດອາການຮຸນແຮງ ເຮັດໃຫ້ປະເທດສະມາຊິກສະຫະພາບເອີຣົບ (EU) ສາມາດນຳໃຊ້ຢາເມັດດັ່ງກ່າວ ຫລັງຈາກ EMA ອອກຄຳແນະນຳການນຳໃຊ້ສຸກເສີນເມື່ອທ້າຍປີຜ່ານມາ.

ສຳນັກຂ່າວຊິນຮົວລາຍງານວ່າ: ຄະນະກຳມະການພິຈາລະນາການນຳໃຊ້ຢາໃນມະນຸດ (CHMP) ແນະນຳໃຫ້ອະນຸມັດການວາງຕະຫລາດແບບມີເງື່ອນໄຂແກ່ “ແພກໂລວິດ” ຢາຕ້ານໄວຣັສຊະນິດຮັບປະທານ ເພື່ອປິ່ນປົວພະຍາດໂຄວິດ-19 ໃນຜູ້ໃຫຍ່ທີ່ບໍ່ຕ້ອງບຳບັດດ້ວຍອົກຊີ ແລະ ສ່ຽງອາການໜັກ.

ທັງນີ້ ແພກໂລວິດເປັນຢາຕ້ານໄວຣັສຊະນິດຮັບປະທານສູດທຳອິດທີ່ EU ແນະນຳໃຫ້ໃຊ້ປິ່ນປົວພະຍາດໂຄວິດ-19 ໂດຍຢາປະກອບມີສານອອກລິດສອງຊະນິດລວມກັນ ເຊິ່ງຊະນິດທຳອິດຈະຫລຸດຄວາມສາມາດເພີ່ມຈຳນວນຂອງເຊື້ອໄວຣັສໃນຮ່າງກາຍ, ຂະນະທີ່ອີກຊະນິດໜຶ່ງຊ່ວຍໃຫ້ສານຊະນິດທຳອິດຄົງຢູ່ໃນຮ່າງກາຍໄດ້ດົນຂຶ້ນໃນລະດັບທີ່ສົ່ງຜົນຕໍ່ການເພີ່ມຈຳນວນຂອງເຊື້ອໄວຣັສ.

ນອກຈາກນີ້, EMA ຍັງປະເມີນຂໍ້ມູນຈາກການສຶກສາທີ່ກ່ຽວຂ້ອງກັບຜູ້ຕິດເຊື້ອໂຄວິດ-19 ເຊິ່ງບົ່ງຊີ້ວ່າ: ການປິ່ນປົວດ້ວຍຢາແພກໂລວິດສາມາດຫລຸດຄວາມສ່ຽງເຂົ້າຮັບການປິ່ນປົວໃນໂຮງໝໍ ແລະ ເສຍຊີວິດໃນຜູ້ຕິດເຊື້ອທີ່ມີພະຍາດປະຈຳຕົວຢ່າງໜ້ອຍໜຶ່ງພະຍາດ.

ເຖິງວ່າຜູ້ຕິດເຊື້ອສ່ວນຫລາຍທີ່ເຂົ້າຮ່ວມການສຶກສາເບື້ອງຕົ້ນຈະເປັນຜູ້ຕິດເຊື້ອໄວຣັສສາຍພັນເດວຕາ, ແຕ່ຈາກການສຶກສາໃນຫ້ອງປະຕິບັດການຄາດວ່າ ຢາແພກໂລວິດຈະສາມາດຕໍ່ຕ້ານເຊື້ອໄວຣັສສາຍພັນໂອມິຄຣອນ ແລະ ສາຍພັນອື່ນໆໄດ້ຢ່າງມີປະສິດທິພາບເຊັ່ນກັນ ໂດຍມີຜົນຂ້າງຄຽງຂອງຢານັ້ນບໍ່ຮຸນແຮງ.

ອ້າງອີງ:

https://www.xinhuathai.com/high/258867_20220128