ສປປ ລາວ ໄດ້ຮັບວັກຊີນປ້ອງກັນພະຍາດໂຄວິດ-19 AstraZeneca ເພີ່ມຈໍານວນ 500,000 ກວ່າໂດສ ຈາກປະເທດ ໂປແລນ
ໃນວັນທີ 7 ມັງກອນ 2022 ນີ້, ສປປ ລາວ ໄດ້ຮັບວັກຊີນ AstraZeneca ເພີ່ມຈາກ ປະເທດໂປແລນ ຈໍານວນ 501,600 ໂດສ ເຊິ່ງ ພິທີມອບ-ຮັບວັກຊີນ ໄດ້ຈັດຂຶ້ນທີ່ກະຊວງສາທາລະນະສຸກ ແລະ ໂດຍການກ່າວຮັບຂອງ ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ແລະ ຕາງໜ້າ ກ່າວມອບ ຂອງທ່ານ ນາງ ໄບບ້າ ຊາລີນາ, ອຸປະທູດແຫ່ງສະຫະພາບເອີຣົບ ປະຈຳ ສປປ ລາວ ມີຕາງໜ້າກະຊວງການຕ່າງປະເທດ, ກະຊວງສາທາລະນະສຸກ ແລະ ພະນັກງານຂອງສະຫະພາບເອີຣົບ ເຂົ້າຮ່ວມ.
ທ່ານລັດຖະມົນຕີ ກະຊວງສາທາລະນະສຸກ ກ່າວວ່າ: ‘ລັດຖະບານ ສປປ ລາວ ຍິນດີທີ່ໄດ້ຮັບວັກຊີນໃນຊຸດນີ້ ແລະ ຂໍຂອບໃຈ ລັດຖະບານໂປແລນ ຕໍ່ການປະກອບສ່ວນຢ່າງຕໍ່ເນື່ອງ ເຊິ່ງຈະເປັນການປະກອບສ່ວນຢ່າງ ໃຫຍ່ຫຼວງໃຫ້ລາວໃນເປົ້າໝາຍຂອງປະເທດທີ່ຈະສັກວັກຊີນໃຫ້ກວມໄດ້ຢ່າງໜ້ອຍ 70 ເປີເຊັນ ຂອງຈຳນວນປະຊາກອນທັງໝົດ.
ພ້ອມນີ້, ທ່ານ ອຸປະທູດແຫ່ງສະຫະພາບເອີຣົບ ປະຈຳ ສປປ ລາວ ກ່າວວ່າ: ‘ພວກເຮົາຮູ້ສຶກດີ ໃຈທີ່ໄດ້ເຫັນ ປະເທດໂປແລນ ແລະ ທີມເອີຣົບ ໄດ້ສືບຕໍ່ການສະໜັບສະໜູນໃຫ້ແກ່ ສປປ ລາວ ໃນການຕ້ານການແຜ່ລະບາດຂອງໂຄວິດ ແລະ ຜົນກະທົບຂການປະກອບສ່ວນເພີ່ມໃນຄັ້ງນີ້ ຈະຊ່ວຍໃຫ້ລັດຖະບານລາວ ສຸມໃສ່ຂະບວນການສັກຢາວັກຊີນ ເພືອສ້າງພູມຄຸ້ມກັນໃຫ້ປະຊາຊົນໃຫ້ກວມເອົາຈຳນວນຫຼາຍຂຶ້ນ’
ວັກຊີນເຫຼົ່ານີ້ເເມ່ນຈະໄດ້ນໍາໃຊ້ເປັນຕົ້ນເພື່ອໃຫ້ການປ້ອງກັນເເກ່ຜູ້ທີ່ມີຄວາມສ່ຽງສູງຕໍ່ການຕິດເຊື້ອພະຍາດ ໂຄວິດ-19 ຂັ້ນຮ້າຍແຮງ ແຕ່ຍັງບໍ່ທັນໄດ້ຮັບວັກຊີນຄົບເຂັມເທື່ອ. ກຸ່ມບູລິມະສິດສຳລັບການສັກວັກຊີນກັນພະຍາດ ໂຄວິດ-19 ເເມ່ນປະກອບມີ ພະນັກງານສາທາລະນະສຸກແຖວໜ້າ, ຜູ້ສູງອາຍຸ 60 ປີຂຶ້ນໄປ, ຄົນທີ່ມີພະຍາດປະຈໍາໂຕ, ແມ່ຍິງຖືພາ ແລະ ບຸກຄະລາກອນທີ່ສໍາຄັນ ເຊັ່ນ: ຄູສອນ ແລະ ພະນັກງານໃນທົ່ວປະເທດ, ອີງຕາມທີ່ລະບຸໄວ້ໃນ ແຜນປະຕິບັດການສັກວັກຊີນກັນພະຍາດ ໂຄວິດ-19 ແຫ່ງຊາດ.
