ປະໂຫຍດຈາກຖົ່ວຂຽວ ຫລຸດໄຂມັນ-ບຳລຸງຫົວໃຈ
ຖົ່ວຂຽວ ຫາກິນງ່າຍ ລາຄາຖືກ ທັງຍັງມີປະໂຫຍດຫລາຍກ່ວາທີ່ຄິດ ທັງຊ່ວຍຫລຸດຄໍເລສເຕີໂຣນ, ບຳລຸງຫົວໃຈ ແລະ ອີກຫລວງຫລາຍ ຫາກຄິດເຖິງຖົ່ວຂຽວ ທຸກຄົນນຶກເຖິງຫຍັງແດ່ ບາງຄົນອາດນຶກເຖິງລາຍການອາຫານງ່າຍໆ ເຊັ່ນ : ຕົ້ມຖົ່ວຂຽວຫວານອ່ອນໆ, ບາງຄົນອາດນຶກເຖິງຖົ່ວຂຽວເມັດທີ່ເອົາມາປູກເພື່ອໃຫ້ໄດ້ຖົ່ວງອກ, ແຕ່ຄວາມຈິງແລ້ວຖົ່ວຂຽວນັ້ນມີຄຸນປະໂຫຍດທີ່ດີຕໍ່ຮ່າງກາຍຫລາຍ ໂດຍຖົ່ວຂຽວ ປະລິມານ 100 ກຣາມ ມີຄຸນຄ່າທາງສານອາຫານດັ່ງນີ້ :
- ໂປຣຕິນ 24 ກຣາມ.
- ນ້ຳຕານ 6 ກຣາມ.
- ເສັ້ນໄຍອາຫານ 16,3 ກຣາມ.
- ທາດເຫລັກ.
- ສານໂພລີຟີນອລ.
- ແຄໂຣທີນ.
ເຊິ່ງຖົ່ວຂຽວມີປະໂຫຍດທີ່ດີຕໍ່ຮ່າງກາຍ ເພາະມີສ່ວນຊ່ວຍໃນການຫລຸດລະດັບຄໍເລສເຕີໂຣນໃນເລືອດ. ຈາກວຽກງານວິໄຈທີ່ທົດລອງໃນໜູ ລະບຸວ່າ : ໜູທີ່ກິນຖົ່ວຂຽວມີລະດັບໄຂມັນ ແລະ ຄໍເລສເຕີໂຣນຊະນິດບໍ່ດີຫລຸດລົງ ລວມທັງມີໄຂມັນດີເພີ່ມຂຶ້ນ ຖົ່ວຂຽວຈຶ່ງອາດເປັນໂຕເລືອກທີ່ດີໃນການຊ່ວຍຫລຸດລະດັບຄໍເລສເຕີໂຣນທີ່ບໍ່ດີໃນຮ່າງກາຍໄດ້.
- ນອກຈາກນີ້, ຖົ່ວຂຽວຍັງຊ່ວຍປ້ອງກັນການເກີດໄຂມັນຫຸ້ມຕັບທີ່ບໍ່ໄດ້ເກີດຈາກອານກໍຮໍໄດ້ນຳ ມາຈາກຜົນການທົດລອງໃນໜູທີ່ກິນຖົ່ວຂຽວຕິດຕໍ່ກັນ 4 ອາທິດ ສ່ຽງໄຂມັນໃນຕັບໜ້ອຍກ່ວາໜູທີ່ບໍ່ກິນຖົ່ວຂຽວ, ແຕ່ທັງໝົດຍັງເປັນການທົດລອງໃນໜູ ແລະ ການທົດລອງບາງສ່ວນໃຊ້ເປືອກຖົ່ວຂຽວມາສະກັດ ຫລື ປະສົມຖົ່ວຂຽວກັບພືດຊະນິດອື່ນ ດັ່ງນັ້ນ ຄວນລໍຖ້າການສຶກສາໄລຍະຍາວກັບກຸ່ມຄົນຈຳນວນຫລາຍເພີ່ມຕື່ມຕໍ່ໄປ.
- ຖົ່ວຂຽວຫລຸດຄວາມສ່ຽງອັນຕະລາຍຈາກຫົວໃຈ : ມີວຽກງານວິໄຈລະບຸວ່າ ຖົ່ວຂຽວຊ່ວຍປ້ອງກັນອາການກ້າມຊີ້ນຫົວໃຈຕາຍໄດ້ ແລະ ຍັງຊ່ວຍຫລຸດຄວາມສ່ຽງຕໍ່ອາການເນື້ອເຍື່ອຫົວໃຈຖືກທຳລາຍ ຈາກການສຶກສາກັບໜູທົດລອງພົບວ່າ ສານໂພລີຟີນອລ ເຊິ່ງສະກັດຈາກຖົ່ວຂຽວຊ່ວຍເສີມສ້າງເນື້ອເຍື່ອຫົວໃຈໄດ້ ທັງຍັງຊ່ວຍຂັດຂວາງບໍ່ໃຫ້ເນື້ອເຍື່ອຫົວໃຈຖືກທຳລາຍ ເຊິ່ງເປັນປັດໄຈທີ່ອາດນຳໄປສູ່ອາການກ້າມຊີ້ນຫົວໃຈຕາຍໄດ້, ແຕ່ເນື່ອງຈາກຍັງບໍ່ມີຜົນການທົດລອງໃນຄົນ ຈຶ່ງຄວນຕິດຕາມຂໍ້ມູນເພີ່ມຕື່ມຈາກວຽກງານວິໄຈອື່ນໆໃນອະນາຄົດຕໍ່ໄປ.
- ການກິນຖົ່ວຂຽວໃຫ້ດີຕໍ່ສຸຂະພາບ ແມ່ນການກິນໃນປະລິມານທີ່ເໝາະສົມ ປະມານ 1 ກຳມືຕໍ່ມື້ ຫລີກເວັ້ນການປຸງແຕ່ງຖົ່ວຂຽວກັບນ້ຳຕານ ຫລື ຫາກມັກກິນຖົ່ວຂຽວຕົ້ມນ້ຳຕານ ຫລື ນ້ຳຫວານ ລວມທັງນ້ຳຖົ່ວຂຽວ ຫລື ເປັນຂອງຫວານຕ່າງໆ ຄວນບໍລິໂພກໃນປະລິມານທີ່ຈຳກັດ ເພື່ອຫລີກເວັ້ນການກິນນ້ຳຕານຫລາຍເກີນໄປ.
