ກິນປາແຊວມັອນດິບແນວໃດໃຫ້ປອດໄພຕໍ່ສຸຂະພາບ
ອາຫານດິບມັກສ່ຽງເຊື້ອພະຍາດ, ເຊື້ອແບັກທີເຣຍຕ່າງໆທີ່ມາກັບອາຫານ ເພາະບໍ່ໄດ້ຖືກທຳລາຍໂດຍການຜ່ານການປຸງແຕ່ງດ້ວຍຄວາມຮ້ອນ ອາຫານດິບຈຶ່ງມັກຕົກເປັນສາເຫດຂອງພະຍາດທີ່ກ່ຽວຂ້ອງກັບທາງເດີນອາຫານຕ່າງໆ ຕັ້ງແຕ່ພະຍາດທີ່ພົບໄດ້ຫລາຍ ເຊັ່ນ : ຖອກທ້ອງ, ອາຫານເປັນພິດ ໄປຈົນເຖິງແມ່ທ້ອງ ຫລື ແມ່ພະຍາດຕ່າງໆ ທີ່ອາດມາກັບອາຫານສົດ ທັງຈາກຊີ້ນສັດ ແລະ ຜັກ-ໝາກໄມ້ທີ່ປົນເປື້ອນ.
ປາແຊວມັອນ ທີ່ກິນດິບແບບຊາຊິມິ ອາດມີແມ່ພະຍາດບາງຊະນິດທີ່ສາມາດພົບໄດ້ ເຊັ່ນ : ແມ່ພະຍາດກຸ່ມອະນິສຊາຄິສ Anisakidae ແລະ ຈຸລິນຊີຕ່າງໆທີ່ອາດເຮັດໃຫ້ເກີດພະຍາດອາຫານເປັນພິດ ເຊັ່ນ : ອີໂຄໄລ E.coli, ເຊື້ອວິບຣິໂອ ພາຣາຮີໂມໄລຕິຄັສ Vibrio parahaemolyticus, ວິບຣິໂອ ໂຄເລີເຣ Vibrio cholera, ຊາລໂມເນລລ່າ Salmonella ssp., ລິສທີເຣຍ ໂມໂນໄຊໂຕຈີເນສ Listeria monocytogenes ແລະ ສະແຕັບຟີໂລຄັອກຄັສ ອໍຣຽສ Staphylococcus aureus. ການປົນເປື້ອນຂອງຈຸລິນຊີກໍ່ພະຍາດດັ່ງກ່າວອາດເກີດຈາກການປົນເປື້ອນຈາກສິ່ງແວດລ້ອມ ເຊັ່ນ : ເຊື້ອລິສທີເຣຍ ໂມໂນໄຊໂຕຈີເນສ ຫລື ປົນເປື້ອນຈາກນ້ຳທະເລຕາມທຳມະຊາດ ໄດ້ແກ່ : ເຊື້ອວິບຣິໂອ ພາຣາຮີໂມໄລຕິຄັສ ຫລື ເຊື້ອອະຫິວາທຽມ ແລະ ການປົນເປື້ອນເຊື້ອແບັກທີເຣຍໃນຂະນະຄົວ ແລະ ຊອຍປາດິບ ເຊັ່ນ : ເຊື້ອຊາລໂມເນລລ່າ ເຊິ່ງສ່ວນຫລາຍເກີດຈາກການປົນເປື້ອນຂອງເຊື້ອແບັກທີເຣຍຈາກອາຫານດິບອື່ນໆ ໂດຍການໃຊ້ອຸປະກອນເຄື່ອງຄົວ ເຊັ່ນ : ມີດ, ຂຽງ ແລະ ພາຊະນະຮ່ວມກັນ ໂດຍບໍ່ໄດ້ລ້າງໃຫ້ສະອາດ, ແຕ່ບາງກໍລະນີການປົນເປື້ອນເຊື້ອຊາລໂມເນລລ່າ ແລະ ອີໂຄໄລ ເຊິ່ງເປັນເຊື້ອທີ່ພົບໄດ້ໃນອາຈົມຂອງຄົນ ແລະ ສັດນັ້ນ ອາດມາຈາກຜູ້ປະກອບທຸລະກິດມີສຸຂະພາບລັກສະນະສ່ວນບຸກຄົນທີ່ບໍ່ເໝາະສົມ ເຊັ່ນ : ບໍ່ລ້າງມືໃຫ້ສະອາດພາຍຫລັງການເຂົ້າຫ້ອງນ້ຳ.
- ກິນແຊວມັອນດິບແນວໃດໃຫ້ປອດໄພຕໍ່ສຸຂະພາບ ?
- ເລືອກກິນແຊວມັອນຈາກຜູ້ຜະລິດ ຫລື ຈາກຮ້ານທີ່ໝັ້ນໃຈໃນຄຸນນະພາບ ແລະ ເຊື່ອຖືໄດ້ ຫລື ເປັນແຊວມັອນເກຣດສຳລັບກິນແບບຊາຊິມິໄດ້ເທົ່ານັ້ນ ແຊນມັອນຈະໄດ້ຮັບການກຳຈັດພະຍາດ ແລະ ເຊື້ອຈຸລິນຊີຕ່າງໆໂດຍການແຊ່ແຂງຢູ່ອຸນຫະພູມຕ່ຳກ່ວາ -35 ອົງສາເຊ ຢ່າງໜ້ອຍ 15 ຊົ່ວໂມງ ຫລື ຕ່ຳກ່ວາ – 20 ອົງສາເຊ ຢ່າງໜ້ອຍ 7 ຊົ່ວໂມງ ຫລື ຜ່ານຄວາມຮ້ອນຫລາຍກ່ວາ 60 ອົງສາເຊ ຢ່າງໜ້ອຍ 5 ນາທີ ກ່ອນການປະກອບອາຫານຈະເຮັດໃຫ້ແມ່ພະຍາດຊະນິດນີ້ຕາຍໄດ້.
- ສອບຖາມແຫ່ລງທີ່ມາຂອງປາ (ຖ້າຜູ້ຈຳໜ່າຍໃຫ້ຂໍ້ມູນໄດ້) ສ່ວນຫລາຍແຊວມັອນເກຣດຊາຊິມິມັກມາຈາກທັງນ໊ອກແວ ແລະ ຍີ່ປຸ່ນ.
- ຜູ້ປຸງແຕ່ງອາຫານ ແລະ ຜູ້ຄົວປາ ຕ້ອງລ້າງມືໃຫ້ສະອາດກ່ອນຈັບອາຫານ ແລະ ຖ້າມີບາດແຜຢູ່ມື ໃຫ້ຕິດບາດແຜດ້ວຍພລາສະເຕີ ແລະ ໃສ່ຖົງມືຂະນະປຸງແຕ່ງອາຫານ ເພື່ອຫລຸດໂອກາດການປົນເປື້ອນເຊື້ອສະແຕັບຟີໂລຄັອກຄັສ ອໍຣຽສ ແລະ ເຊື້ອອື່ນໆສູ່ອາຫານ.
- ແຊວມັອນຊະນິດຊອຍເປັນຕ່ອນໆແລ້ວ ຄວນບັນຈຸໃນພາຊະນະທີ່ປິດຮຽບຮ້ອຍ ເຊັ່ນ : ຖາດທີ່ມີແຜ່ນຟີມປລາສະຕິກຫຸ້ມແໜ້ນໜາດີ ເພື່ອປ້ອງກັນການປົນເປື້ອນເຊື້ອແບັກທີເຣຍຕ່າງໆ.
- ຫາກເປັນແຊວມັອນແບບຊື້ກັບເຮືອນ ຂະນະວາງຈຳໜ່າຍ ແລະ ຄວນເກັບຮັກສາໃນອຸນຫະພູມແຊ່ເຢັນຕະຫລອດອາຍຸການຈຳໜ່າຍ ເພື່ອຄວບຄຸມການເພີ່ມປະລິມານຂອງເຊື້ອແບັກທີເຣຍ ແລະ ເນື່ອງຈາກເປັນອາຫານທີ່ບູດເນົ່າງ່າຍ ຈຶ່ງຄວນຮີບກິນໃຫ້ໝົດພາຍໃນມື້ທີ່ຊື້.
