ການສຶກສາໃນອາຟຣິກາໃຕ້ເຜີຍ ເຊື້ອໂອມິຄຣອນເພີ່ມໂອກາດ 3 ເທົ່າ ໃຫ້ຜູ້ທີ່ເຄີຍຕິດໂຄວິດແລ້ວອາດຕິດອີກໄດ້
ວັນທີ 3 ທັນວາ 2021, ຈາກການສຶກສາໃນອາຟຣິກາໃຕ້ທີ່ຮວບຮວມຂໍ້ມູນນັບແຕ່ຊ່ວງທຳອິດຂອງການແຜ່ລະບາດໂຄວິດ ໂດຍ ຈູລຽດ ພູລຽມ ນັກວິເຄາະຈາກ Center for Epidemiological Modelling and Anzlysis (CEMA) ຂອງອາຟຣິກາໃຕ້ ແລະ ແຮຣີ ມອລທຣີ ຈາກສູນພະຍາດລະບາດແຫ່ງຊາດ (NICD) ເຜີຍວ່າ: ເຊື້ອໄວຣັສໂຄໂຣນາກາຍພັນ ສາຍພັນໂອມິຄຣອນ ເພີ່ມໂອກາດໃຫ້ຜູ້ທີ່ເຄີຍຕິດໂຄວິດແລ້ວອາດຕິດອີກໄດ້ເຖິງ 3 ເທົ່າ.
ໂດຍການສຶກສາດັ່ງກ່າວໄດ້ຮວບຮວມຂໍ້ມູນຂອງຜູ້ຕິດໂຄວິດໃນລະບົບສາທາລະນະສຸກຂອງອາຟຣິກາໃຕ້ປະມານ 2,8 ລ້ານຄົນ ນັບແຕ່ເດືອນມີນາ 2020 ຈົນເຖິງວັນທີ 27 ພະຈິກຜ່ານມາ ໂດຍໃນຈຳນວນຜູ້ຕິດເຊື້ອທັງໝົດນີ້ມີຈຳນວນ 35.670 ຄົນອາດພົບປະຫວັດການຕິດໂຄວິດອີກ.
“ສິ່ງທີ່ເຮົາໃຫ້ຄວາມສຳຄັນຫລາຍທີ່ສຸດຕອນນີ້ຄືຂອບເຂດຄວາມສາມາດໃນການຫລີກລ່ຽງລະບົບພູມຕ້ານທານ ທັງຈາກທີ່ເກີດຂຶ້ນເອງ ແລະ ເກີດຂຶ້ນຈາກການເຂົ້າຮັບວັກຊີນຂອງເຊື້ອໂອມິຄຣອນ ລວມທັງຄວາມສາມາດໃນການແຜ່ກະຈາຍເຊື້ອ ແລະ ຄວາມຮຸນແຮງຂອງເຊື້ອ ເມື່ອທຽບໃສ່ສາຍພັນອື່ນໆ”.
ກວດພົບເຊື້ອໂອມິຄຣອນໃນຫລາຍປະເທດທາງຕອນໃຕ້ຂອງທະວີບອາຟຣິກາ ໂດຍທາງການອາຟຣິກາໃຕ້ປະກາດໃຫ້ປະຊາຄົມໂລກຮັບຮູ້ປະມານວັນທີ 25 ພະຈິກຜ່ານມາ ກ່ອນອົງການອະນາໄມໂລກ (WHO) ຈະປະກາດໃຫ້ເຊື້ອສາຍພັນນີ້ເປັນສາຍພັນທີ່ໜ້າກັງວົນ (VOC) ຕໍ່ຈາກເຊື້ອເດວຕາ ກ່ອນຈະພົບຜູ້ຕິດເຊື້ອໃນຫລາຍປະເທດຕໍ່ເນື່ອງ ຜູ້ຕິດໂຄວິດໃນອາຟຣິກາໃຕ້ເອງກໍເພີ່ມຈຳນວນຂຶ້ນອີກທົບເທົ່າໃນວັນດຽວ ທ່າມກາງການແຜ່ລະບາດຂອງເຊື້ອໂອມິຄຣອນ ຜູ້ຊ່ຽວຊານເຝົ້າຕິດຕາມ ເຊື້ອໂອມິຄຣອນອາດມີທ່າອ່ຽງກາຍເປັນເຊື້ອສາຍພັນຫລັກທີ່ແຜ່ລະບາດໃນປະເທດແທນເຊື້ອເດວຕາໄດ້ໃນອະນາຄົດ.
ອ້າງອີງ:
- https://www.bloomberg.com/news/articles/2021-12-02/south-africa-finds-threefold-rise-in-omicron-reinfection-risk?sref=CVqPBMVg
- https://www.france24.com/en/live-news/20211202-reinfections-three-times-more-likely-with-omicron-s-african-research
- https://www.theguardian.com/global-development/2021/dec/02/omicron-may-cause-more-covid-reinfections-say-south-african-experts
