ນ້ຳຍັງປອມ ! ໜຸ່ມຈີນຖືກຈັບໄດ້ ປອມນ້ຳຍີ່ຫໍ້ດັງຂາຍ

​ເວັບ​ໄຊ​ຂ່າວ​ຈີນ “ຊ່າງ​ໄຫ່ ​ເດ​ລີ” ລາຍ​ງານ​ຈາກ​ເມືອງ​ຊຽງ​ໄຮ້ ປະ​ເທດ​ຈີນ ​ໃນ​ວັນ​ທີ 27 ກໍລະກົດ​ນີ້​ວ່າ: ພະນັກງານ​ໄອ​ຍະ​ການ​ຂອງ​ເຂດ​ຊົງ​ຈຽງ ​ເມືອງ​ຊຽງ​ໄຮ້ ຂອງ​ຈີນ ​ເປີດ​ເຜີຍ​ວ່າ: ຊາຍ​ຊາວ​ຈີນ​ທີ່​ບໍ່​ໄດ້​ຮັບ​ການ​ບະ​ລຸ​ຊື່ ຮູ້​ພຽງ​​ແຕ່​ນາມສະກຸນ​ວ່າ ຈາງ ຖືກ​ເຈົ້າໜ້າ​ທີ່​ຕຳຫລວດ​ເຂົ້າຈັບ​ກຸມ ພາຍຫລັງ​ປອມ​ແປງ​ນ້ຳດື່ມ​ເພື່ອ​ຈຳໜ່າຍ ​ໂດຍ​ລາວ​ມີ​ລາຍ​ຮັບ​ຈາກ​ການ​ປອ​ມ​ແປງ​ຄັ້ງນີ້​ສູ​ງ​ເຖິງ 150.000 ຢວນ (ປະມານ 180 ລ້ານ​ກີບ)​. ສາ​ເຫດ​ທີ່​ລາວ​ຖືກ​ຈັບ​ໄດ້ ​ເນື່ອງ​ຈາກ​ປະຊາຊົນ​ທີ່​ອາ​ໄສ​ຢູ່​ໃນ​ເຂດ​ຊິນ​ສຽວ ຂອງ​ເມືອງ​ຊຽງ​ໄຮ້ ພົບ​ເຫັນ​ລາວ​ກຳລັງ​ຕື່ມ​ນ້ຳປະປາ​ໃສ່​ຕຸກ​ບັນຈຸ​ນ້ຳດື່ມ​ຍີ່​ຫໍ້​ດັງ​ເຊັ່ນ: Nongfu Spring ​ແລະ Nestle ທີ່​ບໍ່​ມີນ້ຳຢູ່​ໃນ​ຖັງ ຈຶ່ງ​ແຈ້ງ​ຕຳຫລວດ, ​ເມື່ອ​ເຈົ້າໜ້າ​ທີ່​ຕຳຫລວດ​ກວດ​ສອບ​ພົບ​ວ່າ: ລາວ​ປອມ​ແປງ​ນ້ຳດື່ມ​ຍີ່​ຫໍ້​ດັງ ​ໂດຍ​ເອົາ​ນ້ຳປະປາ​ຕື່ມ​ໃສ່​ໃນ​ຕຸກ​ເປົ່າ​ຂອງ​ນ້ຳດື່ມ​ຍີ່​ຫໍ້​ຕ່າງໆ ​ໂດຍ​ລາວ​ຈະ​ໄປ​ຊື້ຕຸກ​ເຫລົ່າ​ນີ້ມາ​ຈາກ​ຮ້ານ​ຂາຍ​ສິນຄ້າ​ເກົ່າ, ​ເມື່ອ​ເຈົ້າໜ້າ​ທີ່​ບຸກ​ເຂົ້າທະລາ​ຍ​ແຫ​ລ່ງຜະລິດ​ນ້ຳພົບ​ວ່າລາວ​ມີ​ຕຸກ​ບັນຈຸ​ນ້ຳທີ່​ກຽມ​ຈະ​ສົ່ງ​ໃຫ້​ລູກ​ຄ້າ​ອີກ​ຫລາຍ​ກວ່າ 300 ຕຸກ.