ປະທານປະເທດ ເນັ້ນໃຫ້ສະຫະພັນແມ່ຍິງລາວເອົາໃຈໃສ່ພັດທະນາບົດບາດແມ່ຍິງໃຫ້ມີຄວາມເຂັ້ມແຂງກ້າວໜ້າ

ໃນໂອກາດໃຫ້ກຽດເຂົ້າຮ່ວມກອງ​ປະ​ຊຸມ​ໃຫ​ຍ່​ຜູ້​ແທນ​ແມ່​ຍິງ​ລາວ​ທົ່ວ​ປະ​ເທດ ຄັ້ງ​ທີ VIII ໃນ​ວັນ​ທີ 19 ພະ​ຈິກ 2021 ນີ້​ ທີ່​ຫໍ​ປະ​ຊຸມ​ແຫ່ງ​ຊາດ, ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ໄດ້ໂອ້ລົມຕໍ່ກອງປະຊຸມດັ່ງກ່າວ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດຂອງຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VII ທີ່ຜ່ານມາ ແລະ ມີຄໍາເຫັນຊີ້ທິດທາງບາງຕອນຄື: ຄະນະສະຫະພັນແມ່ຍິງແຕ່ລະຂັ້ນຕ້ອງຄົ້ນຄວ້າຕື່ມໃນການປະຕິບັດໜ້າທີ່ຕາມພາລະບົດບາດຂອງຕົນ; ສືບຕໍ່ນໍາພາສຶກສາອົບຮົມການເມືອງ-ແນວຄິດ ໃນຖັນແນວສະມາຊິກສະຫະພັນແມ່ຍິງລາວໃຫ້ໜັກແໜ້ນ-ເຂັ້ມແຂງ; ເອົາໃຈໃສ່ປັບປຸງການຈັດຕັ້ງໃຫ້ໜັກແໜ້ນ, ເຂັ້ມແຂງໃນທຸກດ້ານ; ຕັ້ງໜ້າແກ້ໄຂປະກົດການຫຍໍ້ທໍ້ໃນຖັນແຖວເອື້ອຍນ້ອງແມ່ຍິງ; ເອົາໃຈໃສ່ພັດທະນາແມ່ຍິງ ໂດຍສະເພາະແມ່ຍິງທີ່ດ້ອຍໂອກາດ, ເຂດຫ່າງໄກ ດ້ວຍການສ້າງຄວາມເຂັ້ມແຂງສ້າງແຫລ່ງລາຍຮັບທີ່ໝັ້ນຄົງໃຫ້ແກ່ເຂົາເຈົ້າ; ສືບຕໍ່ເພີ່ມທະວີການພົວພັນຮ່ວມມືກັບອົງການຈັດຕັ້ງແມ່ຍິງບັນດາປະເທດເພື່ອນມິດ ແລະ ອົງການສາກົນ ແລະ ອື່ນໆອີກ.

ພ້ອມທັງສ້າງໂອກາດໃຫ້ແມ່ຍິງຢູ່ຊົນນະບົດໃ​ຫ້ຮູ້ຄ້າຂາຍ, ຜະລິດເປັນສິນຄ້າທີ່ຫລາກຫລາຍຮູບແບບສາມາດຕອບສະໜອງຄວາມຕ້ອງການຂອງຕະຫຼາດ, ຊຸກຍູ້ສົ່ງເສີມ, ອໍານວຍຄວາມສະດວກໃຫ້ນັກທຸລະກິດ, ຜູ້ປະກອບການລົງເຖິງທ້ອງຖິ່ນຮາກຖານສັ່ງຈອງສິນຄ້າ, ຝຶກສອນເຂົາເຈົ້າໃຫ້ຜະລິດຖືກກັບຄວາມຕ້ອງການຂອງຕະຫລາດ ແລະ ມີການຜູກພັນຮັບຊື້, ສໍາລັບການພົວພັນຮ່ວມມືກັບຕ່າງປະເທດ, ໃຫ້ບັນດາສະຫາຍເພີ່ມທະວີການພົວພັນຮ່ວມມືກັບອົງການຈັດຕັ້ງແມ່ຍິງຂອງບັນດາປະເທດເພື່ອນມິດ ແລະ ອົງການຈັດຕັ້ງສາກົນດ້ວຍຄວາມເປັນເຈົ້າ ແລະ ມີການເລືອກເຟັ້ນຕາມແນວທາງ, ນະໂຍບາຍການຕ່າງປະເທດຂອງພັກ-ລັດເຮົາ, ໃນຜ່ານມາພວກສະຫາຍເຮັດໄດ້ດີພໍສົມຄວນ, ​ແຕ່ໃນເງື່ອນໄຂເຊື່ອມໂຍງກັບສາກົນໃນຕໍ່ໜ້ານີ້, ພວກເຮົາຍິ່ງຈະຕ້ອງເຮັດໃຫ້ໄດ້ດີກ່ວາເກົ່າ ເພື່ອສືບຕໍ່ຮັກ​ສາ​ຄວາມ​ໄວ້​ເນື້ອ​ເຊື່ອ​ໃຈ​ຊຶ່ງ​ກັນ​ ແລະ​ ກັນ ເພື່ອ​ຍາດ​ແຍ່ງ​ເອົາ​ບັນ​ດາ​ບົດ​ຮຽນ​ອັນ​ດີ​ເດັ່ນ​ມາ​ໝູນ​ໃຊ້​ເຂົ້າ​ໃນ​ການ​ພັດ​ທະ​ນາ​ປະ​ເທດ​ຊາດໃຫ້​ມີ​ການ​ກ້າວ​ໜ້າ​ຢ່າງ​ບໍ່​ຢຸດຍັ້ງ.