ຟີລິບປິນອະນຸມັດວັກຊີນ “ໂມເດິນາ” ໄດ້ຊຸດທຳອິດ 2 ແສນໂດສເດືອນໜ້າ
ອຢ ຟີລິບປິນໄຟຂຽວໃຫ້ໃຊວັກຊີນຂອງໂມເດິນາເປັນກໍລະນີສຸກເສີນ ໂດຍລັດ ແລະ ເອກະຊົນຈັບມືກັນສັ່ງຊື້ເຂົ້າມາຊ່ວຍແກ້ວິກິດໂຄວິດ-19.
ວັນທີ 5 ພຶດສະພາ 2021, ເວັບໄຊຂອງສະຖານີເອບີເອັສ-ຊີບີເອັນ (ABS-CBN News) ລາຍງານວ່າ: ອົງການອາຫານ ແລະ ຢາຂອງຟີລິບປິນອະນຸມັດໃຫ້ນຳໃຊ້ວັກຊີນປ້ອງກັນພະຍາດໂຄວິດ-19 ຂອງໂມເດິນາ (Moderna) ພາຍໃນປະເທດໄດ້ເປັນກໍລະນີສຸກເສີນແລ້ວ ໂດຍໃຊ້ເວລາພຽງ 9 ວັນໃນການອະນຸມັດນັບແຕ່ວັນທີຂໍຂຶ້ນທະບຽນ.
ຟີລິບປິນມີການສັ່ງຊື້ວັກຊີນສັນຊາດອາເມລິກາຊະນິດນີ້ 20 ລ້ານໂດສ ໂດຍແບ່ງເປັນການສັ່ງຊື້ຂອງລັດ 13 ລ້ານ ແລະ ເອກະຊົນອີກ 7 ລ້ານໂດສ ຄາດວ່າຈະໄດ້ຮັບວັກຊີນຊຸດທຳອິດພາຍໃນວັນທີ 15 ມິຖຸນາ ຈຳນວນ 2 ແສນໂດສ.
ລັດຖະບານຂອງປະທານາທິບໍດີ ໂຣດຣິໂກ ດູເຕີເຕ ເລີ່ມດຳເນີນການສັ່ງຊື້ວັກຊີນຈຳນວນດັ່ງກ່າວນັບແຕ່ກາງເດືອນມັງກອນ ພ້ອມລະບຸວ່າວັກຊີນຊະນິດນີ້ເປັນທີ່ຕ້ອງການຫລາຍ ແລະ ມີລາຄາສູງ ຈຶ່ງໄດ້ມີການນຳເອົາເອກະຊົນເຂົ້າມາຊ່ວຍເຫລືອ.
ນອກຈາກວັກຊີນຂອງໂມເດິນາແລ້ວ, ຟີລິບປິນຫວັງວ່າຈະໄດ້ຮັບວັກຊີນໄຟເຊີ (Pfizer) ຈຳນວນ 1 ແສນໂດສ ພາຍໃນເດືອນນີ້ ແລະ ວັກຊີນສະປຸດນິກ ວີ (Sputnik V) ຈາກຣັດເຊຍອີກ 5 ແສນໂດສ ໃນທ້າຍປີນີ້.
ອ້າງອີງ:
https://news.abs-cbn.com/…/fda-approves-emergency-use…
https://www.philstar.com/…/philippines-approves…
