ຫວັງຊີງຊັບ ສຸດທ້າຍຖືກຈັບຄາທີ່

ເຈົ້າໜ້າທີ່ ປກສ ນະຄອນຫລວງວຽງຈັນໃຫ້ຮູ້ວ່າ: ວັນທີ 5 ມີນາ 2021 ມີຊາຍ 2 ຄົນ, ຂີ່ລົດຈັກຊ້ອນກັນກໍ່ເຫດຊີງຊັບດ້ວຍການດຶງກະເປົາຍິງສາວທີ່ຂີ່ລົດຈັກຄົນດຽວຢູ່ບໍລິເວນໃກ້ຕະຫຼາດບ້ານເມືອງນ້ອຍ ເມືອງໄຊເສດຖາ ນະຄອນຫຼວງວຽງຈັນ.

ແຕ່ໂຊກບໍ່ເຂົ້າຂ້າງ ຂະນະທີ່ດຶງກະເປົານັ້ນເຮັດໃຫ້ລົດຈັກຂອງຜູ້ເສຍ ແລະ ຜູ້ກໍ່ເຫດລົ້ມລົງ, ພົນລະເມືອງດີຢູ່ບໍລິເວນໃກ້ຄຽງຕັດສິນໃຈເຂົ້າຈັບກຸມ ແລະນຳຕົວສົ່ງເປົ້າໝາຍທັງ 2 ຄົນ ພ້ອມລົດຈັກນຳໃຊ້ກໍ່ເຫດ ລົດ HONDA wave 100 ເລກທະບຽນ ດຫ 2119 ກຳແພງນະຄອນ ໃຫ້ ປກສ ກຸ່ມ 4 ໂນນຫວາຍ ເມືອງໄຊເສດຖາ.

ຈາກການສອບສວນເບື້ອງຕົ້ນຮູ້ໄດ້ວ່າ: ຜູ້ກະທຳຜິດຊື່ທ້າວ ອາດສະພັງ ອາຍຸ 21 ປີ, ກຳມະກອນ ຢູ່ບ້ານຈອມເພັດ ເມືອງສີສັດຕະນາກ ແລະ ທ້າວ ລັດຕະນີ ອາຍຸ 18 ປີ, ກຳມະກອນ ຢູ່ບ້ານດົງຄຳຊ້າງ ເມືອງຫາດຊາຍຟອງ.

ຕໍ່ກັບເຫດການດັ່ງກ່າວ ກອງບັນຊາການ ປກສ ນະຄອນຫຼວງວຽງຈັນ ຂໍຊົມເຊີຍພົນລະເມືອງດີທີ່ມີຈິດໃຈກ້າຫານ ສະກັດກັ້ນເຫດການດັ່ງກ່າວໄດ້ທັນເວລາ ແລະ ຂໍຝາກຄຳແນະນຳປະຊາຊົນບັນດາເຜົ່າໃຫ້ມີສະຕິລະວັງຕົວ, ຊ່ວຍເປັນຫູເປັນຕາຕິດຕາມກຸ່ມຄົນທີ່ໜ້າສົງໃສເຄື່ອນໄຫວບໍ່ດີ, ເມື່ອພົບເຫັນກຸ່ມຄົນທີ່ບໍ່ໄວ້ວາງໃຈສາມາດແຈ້ງເຈົ້າໜ້າທີ່ທີ່ຢູ່ໃກ້ທີ່ສຸດ ຫຼືແຈ້ງຂໍ້ມູນມາເບີວອດແອັບ ປກສ ນະຄອນຫຼວງວຽງຈັນ 020 28899774.